Pehepehe na PAI  ia RU-FAU-TUMU

''HONO'URA e, a rave na 'oe i te rau 'ape,

I ni'a i to taua ra paepae ia TARAA-TINI-RAU i te faa i A-TAAROA,

A tahiri na oe i te mata'i ra o MAOA'E

Ia pee te rupehu i ni'a i te fenua AIMEHO

Potua i te rai vetea e, potua i te rai vetea e,

Maoa'e te mata'i i ta'u omore ia RU-FAU-TUMU no A-TAAROA

Te TEVA-I-UTA, te TEVA-I-TAI, te TEVA-RARIRARI

Te PORIONUUe, a hi'o na ia RU-FAU-TUMU.

Ua feto'ito'i te are o te moana

Ua ruperupe te hupe o te mou'a

RU-FAU-TUMU e RU-FAU-TUMU e, afa'i na 'oe i to'u nei roo i ni'a i te fenua AIMEHO

Te omore teie a PAI-TUA-RERE, no te faa ra o A-TAAROA.

Te tamaiti a te arii no A-TAAROA o ARII-TAUA

No oe te roo o ta'u e amo nei

E faaite raa i te u'i amuri atu

O RU-FAU-TUMU te i'oa i te omore

I Pati'a hia i AIMEHO

E ore roa te reira roo e mo'e e tae noa atu i te mau u'i ato'a

RU-FAU-TUMU e, RU-FAU-TUMU e,

Peipei na vau ia oe i te otu'e TATAA

I reira ho'i au e faaineine ai i te patiaraa i AIMEHO

E PAI e, a vero, e PAI e, a vero!

Patia na vau ia RU-FAU-TUMU i ni'a i te mou'a tapuhia

Rûrû te ta'i o RU-FAU-TUMU na ni'a i te tua 'aivi

TUA-RERE i te pô, TUA-RERE i te ao

O MARAMA-NUI ho'i, ua he'e.

Te 'oto noa ra re vahine HEI-PUA,

Te u'i rairai, ua fati

MARAE TAPÛ E, ua tini taua i te 'aito no A-TAAROA.

(Pehepehe a PAI: Bulletin des oceanniennes n° 028 de dec. 1928Pp 170-171-Transmis par M.Kemori qui le tenait de Me THURET)

Pehepehe no Afareaitu

(horo'ahia mai e Gaston Richmond e o Maire)

Ua fafati te 'are

I roto i te ava i Tupapa'urau

Ua ta'iri a pahu o te miti

I ni'a i te taha o Motu Ahi

Ua horo te vave'a i roto

I te 'o'o'a i Hotutea

Ua mahu te 'orare

I te muriavai i Putu'a

Ua 'u'ana te maraamu

I te 'otu'e o Umarea

Ua 'ahehe te 'ata

A te tama i Mata'irea

Ua tavevovevo te toparaa pape

I te peho i Atiraa

Ua mamu te natura i Matiti

Ua mau te 'ata

I ni'a i te tapu'ai o Tohi'e'a

Ei hei arii no 'oe e Vairimurimuri

Afareaitu to'a 'Ai'a tumu.

E  mou'a tei ni'a Rotui

Tia'i hia e na maehaa  Te'ava e o Te'avau

E inaha, haruru 'otu'i iho nei te Pahu  i Pererau

Muhu  iho  nei  te  fenua...

E tara  i  ni'a  Rohotu

E tara i raro Rohotu

E tara afa'i  roo 

Mou'a noho  hia e te Vahine Varua o Teremu'ura

O Rohotu te marae

Na Hatara  te  marae

O Na'ona'o  te  marae

O  Tevairoa  te  marae

O  Pererau  te  marae

O  Atita'hae te marae

O Nuurua  te marae

E  mau marae  afa'i  roo no  'oe  Piha'ena

Maeva  e  te  Pou  Nui  Fana'ona'o

Oia te Tavana o Aimeho  Nui

Tei  firi  'aru'aru  maita'i i  teie  'ohipa  ta  tatou

Maeva  e  te  mau  'omo'i  tuitui

No roto mai  ia  'oe e  Paopao

Mai  Ti'a'ia e  e  moti  i  Vaipahu

O  outou  ho'i te  'omo'i  tuitui turamarama

I teie mata'einaa  iti  no  Paopao

Arata'i hia e to tatou  tavana  tuhaa

Maeva  e  te  mau  hoa

Maeva  e  teie Numaha tamarii

Teie  mau  maimoamoa

No  'oe o  Ananahi

Tei  hea  ra  ananahi?

Ananahi  uri  pa'o?

Ananahi  huri è hia  e  te ta'i punu  o  te  moni?

E  'aore ra e  Ananahi  teatea!

Teatea  te  feruriraa

Teatea  te  oraraa

O  ta  tatou  ia e tautoo  nei!

Teie to  tatou mau mono

Tei ratou te hiti-raa  mahana

Tei  tatou  te tape-raa  mahana

E  te  topa-raa  mahana

E  te  mau  hoa,  

Ei faahope -raa i teie mana'o

Te na'o  ra  to  tatou  metua i mo'e  a'e  nei  o  papa  Matarau e:

Rûrû  taina  iho to'u  tino

Motu'utu'u atu  ra te taura  e  nati  nei ia'u   i  te  mau tupuna

I te na'o  raa  e:

Manava tatou  i  te farerei-raa  i teie  mahana!

Manava  e  Ia  ora!

Vauvau-raa parau   na Rotui  vahine

Peretiteni o te  Puna Reo  Piha'e'ina

I te 29 no me 2009

PUNA REO E ...PUNA REO E...

TEIE AU, TEIE  AU

UA  TATA'I TINI   TO'U   'OA'OA

NO  TE  HERE   O   TA  'OE   I   HO MAI

E  'ORE   ROA  TE  REIRA   E   MOU

E  TAU MAORO  TOU  IMIRAA

I TEIE   O  'OTAHI   'OTAHI

PATURAA TAATA

'OIA HO'I E   MA'A  AU   NOA

NO   TO'U  HIROA   ITI  E   HAHE

'OIA   HO'I    E   MA'A    AU NOA

NO    TO'U   HIRO'A   ITI   E

Papa'ihia e LUCIENNE MEIGNEN na roto i te reo farani

Hurihia e Jessie  POROI i roto i te reo tahiti

Pehe-nota-hia e DEDE NOUVEAU

A aupuru i te Pou Matahiapo o Aimeho

Papa’i a’e ra vau i to i’oa i ni’a i te one
Fati mai ra te 'are o te miti
Ma   a’e ra te i’oa

Nana’o a’e ra vau i to i’oa i ni'a i te paa ra'au
Topa mai ra te ua, pe atu ra te ra'au
E topa iho ra i raro

Tohi atu ra vau i to i’oa i roto i te maramora
Topa iho ra i raro e pareha’a roa a’e ra

Inaha, rave iho ra vau i to i’oa
Tuu atu ra vau i roto i te hohonuraa o te papa o to’u a’au
E na te tau i faaherehere mai i to i’oa
Hou a ta’ita’i mai ai ia taua i teie ahiahi

Papa'i-hia e François Haati no te mau Matahiapo no Moorea

TE TAURA  HONO  

Fatu-hia e te Tama no Aimeho

 Haapii-hia e  te Pupu Arioi  i roto i te Fare haapii-raa Tuatahi no Paopao i te area matahiti 1980 .

TE FIRI NEI MATOU

TE TAURA TORU  FENU  E

FAATUPU I TE HAU E

E  TE MAITA'I E  TE HO'E-RAA  E...

TEIE MAI NEI TE MAU TAMATAMA  E 

NO TE FENUA AIMEHO  E

AFA'I MAI NEI  TE MAU PEHEPEHE E

PEHEPEHE NO 'OE 'AIMEHO E

AIMEHO I TE RARA VARU   E

E TAIPE NO TE FEE RA 

TONA I'OA TAU-MATA-FEE-FAATUPU-HAU   E

O TE PIRI TEIE AIMEHO E

                                                    haaputu-hia e Rotui Vahine

 TE  IHO

Te Iho e, te Iho e,  te Iho e,

Tei hea   a'e nei te Iho

Ia iho vau no to'u nei Iho

Tei hea  a'e nei  to'u ma'ai ia 'oe

A mau! A mau tutu'au!

Te Iho i ni'a i te fenua

Te fenua i amo i to'u marae tupuna

Te Iho o to'u nunaa

I parau ato'a hia ai au e:

E MA'OHI!

I MA'OHI NA VAU,

E MA'OHI Â VAU

E A TAU, E A TAU E A HITI NOA ATU!

Papa Matarau

Ivanhoe TEAMOTUAITAU

ORERORAA na ROTUI TANE orero no Aimeho Nui

E te taata tupu no te fenua no Aimeho nui i te rara varu

Ia faarii te taata Maohi i tona taata tupu teie tona reo:

Ia orana, a haere mai, a haere mai i te utua fare nei.

E aore ra, haere mai , tapae mai i te fare nei , tei unei ihoa taua io taua iho.

E homa, e parau faufaa roa te parau no te parururaa i te Aru o te Fenua.

Ia au i te tiaturi raa a te mau hui tupuna i tona ra Atua oia te ora o te mau mea toa.

E tahu’a aratai to te mau ohipa atoa i roto i tona oraraa:Tahu’a no te marae, no te faa’apu, te orero, no te moana, no te rava’i, e te vai atu. E ua vaiho mai te mau hui tupuna i teie faufaa no tana mau hua’ai ma te haapii atoa mai i te mau rave’a ia faananea e ia aupuru teie mau maita’i .

I mutaa ihora e mea atuatu roa te taata Maohi na roto anei i te rahui raa i te tahi mau tuhaa fenua.,te tai roto, te mau apoo Aahi, ua ite te mau Hui tupuna i tona faufaaraa.Te paruru raa atoa i te Aru o te Fenua. Area, i teie nei ra , ua hui ta ha noa hia ia.

Te ite nei tatou i teie nei e te ino nei te mau Tai roto , na roto i te faa î raa i te pae tahatai e tae roatu i te Âhua i te hiti moana. Te mau taepu raa vavara , te mau faaote raa one, te mau raau pape huru rau e faaohipa hia nei i nia i te fenua. Te mau tapuraa fenua e te hooraa ia te taata maohi i tona fenua i te ratere a vai overe noa ai oia i i o na iho.

E reo pii teie ia tatou :Ia apiti maite tatou no te tautooraa ia vai he’euri noa a teie fenua i roto i teie manohiti.

E no te faahope raa i tau nei poro’i , e paripari atu vai i te paripari o te fenua o Pihaena ei faahi’’oraa ia tatou i to tatou tu’atiraa i te Aru o te F mai to tatou mau tupuna mai a. E faufaa tumu teie na tatou, no tatou. Manava e ia ora!

RURUA Maurice

PARIPARI teie na to PIHAENA, no to Pihaena

E moua tei ni'a ROTUI

Tahua tei raro PIHAENA

Otu tei tai NUURUA

E marae teie ATI-TA'IHAE

Ti'araa no oe e TANE e

O TE AVA ROA I TE MITI TA'ITA'I

Vahiraa no te mata'i ra TOERA'U ROA

Hurihuri a'era i ni'a i te one ONE TERE

Pao a'era te one TE ONE TERE

Afa'i atu ra i tahatai E vaiho atu ai.

                      Pa maira te mata'i TOERAU I TE ARIA ROA

Rave mai ra te one TE ONE TERE

Faaho'i mai ra i te vahi i pao hia mai ra

Ua tarava ura te one i PI'OPI'O

Tahua rava'i na oe PIHAENA

Haruru noa mai e patiri MAUTAI

Ua toriri maa ua iti e, i te iriatai

Ua fati ta'ue te miti te a'au

Tapa'o fa'ite ia oe : Ua topa pupara te mau 'ata i'a

Ua hiri te tarao e te roi Ua fa ao te iihi e te apa'i

Mata'i ra ia oe ARUE ROA i te haumaru

Tapa'o faite ia oe PIHAENA :

Ua maraa te mu e te 'o'eo

E ua horo te marava e te ahuru

Are'a i te atiraa avae ra

Taheraa operu ia e te orare

E ia tae i te tau auhune roa ra

E tereraa ia no te auhopu

Mai te ava TE AVA ROA

E tae roa tu i te moana iti ra i PIHAENA

I parau ai te mau Hui tupuna e

A aupuru i te ARU o te FENUA e te MOANA

Ei faufaa na oe e na to mau HUAAI...

Te ORA e, te ORA e, e te ORA e

E aha oe e faarue mai ai ia u? ..